Hovudside

Norsk Munnharpeforum

Festivalar

Produksjonar

Lenkar

Norsk Munnharpeforum

Norsk Munnharpeforum vart stifta i 1998 og har nå over 100 medlemmar. NMF har som mål å utvikle interessa for munnharpa i Norge og å drive opplæring på munnharpe, vidare å formidle kunnskap om munnharpetradisjonane våre, korleis instrumenta blir laga og kva for musikk som fins på munnharpe. Vi ser det også som viktig å formidle kunnskap om munnharpetradisjonar i andre land. Interessa i utlandet for norske munnharpetradisjoner er etter kvart blitt så stor, at det er ei høgt prioritert oppgave å drive ei eiga web-side. For at ho skal fortsetje å væra eit godt og mangesidig forum, ber vi alle som bruker ho om å koma med forslag til vidare utvikling.

Styret i Norsk Munnharpeforum:

Formann: Bent Åserud	Mona Ottesen
Kasserar: Sigbjørn Solbakken	Veronika Søum
Olav Wendelbo	Oddvin Horneland

Org.nummer NMF: 981888979.

Medlemskap:
Kontakt Sigbjørn Solbakken, Øvre Hago 5, 3570 Ål,

E-post: si-solb<krøllalfa>frisurf.no (Spam-filter; erstatt <krøllalfa> med @.)
Medlemskap kostar kr. 250 årleg og inkluderer medlemsbladet Munnharpa.

Heidersmedlemmar:

Leif Løchen, heidersmedlem i 2004:

Leif Løchen (1921 - 2011) var også heidersmedlem i "Landslaget for spelemenn" og i "Norsk lur- og bukkehornlag". I 2001 fekk han Kongens Fortenestemedalje i gull. Han fekk fleire andre prisar for kulturinnsatsen sin, blant anna fekk han i 1997, saman med kona Gunnhild, kulturprisen frå Vågå, heimekommunen deira.

Leif Løchen var utdanna som arkitekt og har arbeidd som konservator på Folkemuseet i Oslo og ved "De Sandvigske samlinger" (Maihaugen) på Lillehammer i tillegg til perioder som gardbrukar på Valbjør, garden til Gunnhild. Heile tida hadde han eit sterkt engasjement for folkemusikk og han var ei drivkraft i å samle kunnskap om gamle tradisjonar og ikkje minst i å blåse nytt liv i dei. Han hadde såleis mykje å seie for den oppblomstringa som har vore innan "eldre folkemusikkinstrument" som munnharpe, salmodikon, langeleik, bukkehorn, lur og fløyter. Han har vore redaktør i Spelemannsbladet.

Han gav mellom anna ut bøkene "Fra skorofele til salmodikon" og "Kantor Lars Roverud og hans salmodikon".

Rolf Karlberg, heidersmedlem i 2004:

Rolf Oddvar Karlberg er fødd 26. mars 1931 i Oslo.
Han er utdanna arkitekt ved NTH og har kunsthistorie mellomfag frå UiO. Han har arbeidd som arkitekt i eit privat firma, i Statens bygg- og eigedomsdirektorat og frå 1984 til 1996 var han direktør på Valdres Folkemuseum. Som museumsdirektør var han med og drog i gang dei årlege munnharpefestivalane, den fyrste på Valdres folkemuseum i 1995.

I utlysingsteksten for museumsdirektørstillinga sto det at det var krav om kjennskap til folkemusikk og dansetradisjonane i Valdres, noko Rolf har i rikt mon. Rolf har vore engasjert i prosjekt rundt dansetradisjonar og taktproblematikk, og skrive artiklar om ulike sider av musikk- og danseforskinga.

Rolf har vore nestleiar i Landslaget for Spelemenn, leiar i Laget for folkemusikk og Norsk Folkemusikklag. Han har site som medlem i Rådet for folkemusikk og er heidersmedlem i Øystre Slidre spel- og dansarlag. I lag med kona Magny har han fått Haldor Røynes ærespris og altså heidersmedlem av Norsk Munnharpeforum.

Han har og vore kappleiksdomar, og halde kurs i spel og dans. Han har spelt in CD'en "Låtta o låttestev frå Valdres" og ilag med familien spelar og syng han på CD plata "Tre ord te de". Rolf var med då Øystre Slidre spel- og dansarlag oppnådde ein 3. plass i lagspel hardingfele på landskappleiken på Gjøvik. Som soloutøvar har han førstepremie både i kveding og på munnharpe på kappleikar, i tillegg til at han saman med Magny har førstepremie frå Landskappleiken i dans klasse A.

Bjørgulv Straume, heidersmedlem i 2008:

Bjørgulv var ein av dei som bidrog til eit nytt gjennombrot for munnharpa i 80-åra. Kassetten "Luftslaget", den første utgjevinga med munnharpe som hovudinstrument, vekte stor interesse hos mange unge, og vart retningsgjevande for den nye trenden i munnharpespel i mange år framover. Utanom at han skapte ein ny spelestil, har Bjørgulv også halde mange munnharpekurs, både i Setesdal og rundt i landet. Han har gjeve ut CD’ane Frå ætt til ætt og Hrynhendt, den siste saman med pianisten Øystein Kikut. Han har og vore med på fleire andre produksjonar, som Frå Senegal til Setesdal saman med Kirsten Bråten Berg, Solo Cissokho og Kouame Sereba.

Både her heime og i utlandet har han opparbeidd seg et stort namn som ein av dei beste og mest produktive munnharpesmedane våre. Bjørgulv har eit drivende godt dansespill, og han har vore med på å gjere munnharpa attraktiv som instrument til dans på kappleiker og i andre samanhengar. Han har vunne klassa for eldre folkemusikkinstrument på Landskappleiken to gonger, og dette førde til at munnharpa vart oppfatta som eit seriøst instrument.

Reidar Sevåg: heidersmedlem i 2008:

Reidar Sevåg har hatt ei sentral rolle innan folkemusikkforskninga i Noreg. Han var konservator ved Norsk Folkemuseum frå 1947 til 1972, og seinare førsteamanuensis ved Norsk folkemusikksamling, Universitetet i Oslo. Sevåg var med i redaksjonen for verket Hardingfeleslåttar, Norsk folkemusikk, Serie I (1979, 1981), og har publisert ei rekkje artiklar om norsk folkemusikk både i Noreg og internasjonalt. Boka Det gjallar og det læt (1973), som handlar om folkelege musikkinstrument, er blitt ein klassikar. Sevåg har også vore leiar av Norsk folkemusikklag, frå 1965 til 1980.

I 1966 var Reidar Sevåg med i det populære TV-programmet Falkeklubben, der han fortalde om munnharpa. Dette var hovudårsaken til den store munnharpe-boomen på slutten av sekstitalet.

På 1970-talet laga han radioprogram om eldre folkemusikkinstrument. Her fekk mange for første gong høyre munnharpespel av dei gamle meistrane. Dette har, saman med engasjerande formidlingsarbeid retta mot studentar ved UiO og mot barn og ungdom på Norsk Folkemuseum, skapt grunnlaget for den aukande interessen for dette instrumentet i dag. Sevåg fekk også valdrisen Arne Haugli, som var vaktmeister på museet på den tida, til å produsere munnharper for å møte den aukende etterspurnaden. Hauglis munnharpe vart ein suksess, han laga over 600.

Medlemsbladet Munnharpa:
"Munnharpa" kjem ut fire gonger i året og er inkludert i medlemskapet. Bladet inneheld

- artiklar om kjente munnharpe-spelemenn, munnharpesmedar og om munnharpetradisjonar i Norge,

- aktuelt stoff om kva som skjer i samband med munnharpefestivalane,

- nytt fra inn- og utland,

- CD-utgjevingar og andre spesielle hendingar,

- lesarbrev frå interesserte og engasjerte lesarar.

Redaksjonen tek gjerne imot stoff frå lesarane! Kontakt Bernhard Folkestad,

E-post: bernhard.folkestad<krøllalfa>gmail.com (Spam-filter; erstatt <krøllalfa> med @.)

Er du interessert i å få E-post om aktuelle hendingar? Send melding til:

si-solb<krøllalfa>frisurf.no (Spam-filter; erstatt <krøllalfa> med @.)

Web-redaktør er Einar Turtum.

E-post: eturtum<krøllalfa>online.no (Spam filter; erstatt <krøllalfa> med @.)

©2000 Norsk Munnharpeforum

Sist oppdatert 2011-11-10